Komunikado Di Prensa

Akshonista Refineria Di Korsou Ta Retira Van Kwartel Komo Direktor

Willemstad 23 di mei 2019- Riba 23 di mei último akshonista di Refineria di Kòrsou (RdK) a tuma e desishon pa retirá sr. Roderick van Kwartel komo direktor di e kompania. A tuma e desishon aki durante di un reunion ekstraordinario di akshonista di e kompania di gobièrnu.

Dia 12 di òktober di aña pasá Hunta di Komisario di RdK a kuminsá un investigashon tokante posibel iregularidatnan ku a tuma lugá den e proseso di lisitashon pa yega na un operadó di nos refineria.

E rason pa kuminsá un investigashon tabata akusashonnan hasí pa representante di un di e partidonan ku tabata partisipá den e proseso di lisitashon i ku a eksperenshá e iregularidatnan aki.

For di e raport final di Ivy Corporate Defence& Investigations fecha 23 di yanuari 2019 por konstatá ku banda di e trayekto di lisitashon a kuminsá un trayekto paralelo den kua iregularidat a tuma luga. Ta konstata den e rapòrt tambe ku sr. van Kwartel tabata envolví den e iregularidatnan aki. Hunta di Komisario a konkluí ku sr. van Kwartel no a informá Hunta di Komisario korekto.

Hunta di Komisario a perkurá ku Sr. van Kwartel, tantu durante komo despues di e investigashon, a haña i tabatin sufisiente oportunidat pa keda skuchá i ku e por a duna su punto di bista, hasta durante di e proseso, tokante di loke tabata keda konstatá. Sr. van Kwartel a haña varios oportunidat pa hasi aki.

Hunta di Komisario, despues di a studia tantu e resultadonan komo e punto di bista di Sr. van Kwartel, a konkluí ku Sr. van Kwartel, dor di a inisiá i partisipá den un trayekto paralelo na e proseso di lisitashon i a informá Hunta di Komisario no korekto ni kompletu, no a komportá su mes manera mester spera di un bon gerente. Banda di esaki a konta pa Hunta di Komisario tambe ku Sr. van Kwartel, den su funshon i teniendo kuenta ku e sirkunstanshanan, mester a realisá su mes ki konsekuensha su akto lo tin pa e proseso di lisitashon i tambe pa interes general. Hunta di Komisario pa e rasonnan aki a pèrdè konfiansa den Sr. van Kwartel komo direktor statutario i a konsehá e úniko akshonista di e kompania pa duna retiro na Sr. van Kwartel.

Despues ku akshonista a pidi konseho di e konsehero pa loke ta trata “corporate governance” i esaki a duna su konseho dia 25 di aprel último den kua ku e ta indiká ku e no ta mira rason bálido ku ta pisa kontra di e desishon pa retirá Sr. van Kartel, a tuma e desishon pa tene un reunion ekstraordinario di akshonista dia 23 di mei último. A skucha Sr van Kwartel durante di e reunion aki i a duna oportunidat na gerensha i Hunta di Komisario pa duna nan konseho. Reunion di akshonista a konstatá, teniendo kuenta ku tur argumentu ku a ser presenta di ambos banda, ku no a bin echo i sirkunstanshanan ku ta hustifiká e aktuashon di sr. van Kwartel. P’esei reunion general di akshonistanan a tuma e desishon pa retirá Sr. Van Kwartel inmediatamente.

FIN