CRU, Riba Petishon Di Refineria Isla, Ta Redusi Produkshon Di Stom En Espera Pa Isla Start Su Plantanan

Willemstad 18 di Yuni 2018- Curaçao Refinery Utilities (CRU), kompania ku ta kai bou di Refineria di Kòrsou for di mas ku dos siman pasá a pone Boiler-2 di stom bèk den funshon.   CRU, riba petishon di Refineria Isla, sinembargo ta redusí su produkshon di stom i utilidat en espera pa Refineria Isla por resolvé algun situashon ku a surgi i despues start su plantanan.  Resientemente por a tuma nota di sierto informe ku por a krea e impreshon ku ainda ta wardando riba Boiler- 2 di CRU pa drenta den funshon.  Esaki no ta kuadra ku e realidat.  CRU debidamente tabata kla pa suministrá refineria ku e stom i utilidat nesesario pa por pone tur su plantanan bèk den funshon.

CRU entretantu ta sigui konsentrá riba reparashon di Boiler-3.  Di e forma aki pa mas tardaá fin di sèptèmber Boiler-3 tambe por ta den funshon i garantisá suministro di stom na Refineria Isla. Manera e indikaá anteriormente na momentu ku Boiler-3 drenta servisio, Boiler-2 lo bai pa un inspekshon profundo di gobièrnu (Stoomwezen). 

Asina Refineria Isla ta kla i informá CRU ku nan por start su plantanan i operá optimal, CRU lo oumentá su produkshon afin ku Refineria Isla por produsí atrobe lo maksimo di su kapasidat.  Refineria di Kòrsou/ Curaçao Refinery Utilities lo sigui hasi esfuerso pa garantisá funshonamentu optimal di su plantanan afin ku nos refineria por ta den operashon óptimo.

-FIN-

Nota pa redakshon:

Pa mas informashon tokante di e komunikado di prensa tuma kontakto ku:

Alvin Martina

Tel.: 565- 0347

e-mail: alvinmartina@hotmail.com