Komunikado Di Prensa

Sufisiente stom i koriente pa Refineria Isla promé ku Pasku

CRU Ta “On” I Bek Den Operashon

Willemstad 17 di desèmber 2018- Trabounan riba boilernan di BOO, operá pa Curaçao Refinery Utilities (CRU), ta progresando hopi bon. Manera kos ta pinta aworakí, e plantanan di CRU ta kla pa start ku suministro di  utilidat na Refineria Isla promé ku dianan di fiesta benidero. Lo mantené i oumentá suministro di koriente riba ret di Aqualectra pa komunidat di Kòrsou.

Refineria Isla a keda mas ku 6 luna sin por produsí. Un di e motibunan tabata pa falta di produkshon i suministro di stom i koriente di e plantanan di BOO ku CRU tabata trahando riba dje.

Gerensia i personal di CRU a hasi tur esfuerso posibel pa drecha e plantanan di utilidat mas lihé posibel. Ta trata aki di plantanan di produkshon di stom (boilernan.) Stom ta nesesario pa traha koriente i pa operá makinarianan di e refineria. Ku skemanan di trabou ku kobertura 24/7 profeshonalnan a traha diligentemente pa yega na kumplimentu di un plan di produkshon ku a komprometé ku Refineria Isla 19 di Novèmber último. Sigun e skema ei CRU a kuminsá start e plantanan pa asina hasi posibel ku Refineria Isla por inisiá su operashon i normalisá e kadena di efekto pa nos ekonomia.

Awor ku CRU ta “ON”, komunidat ta spera ku e suministro di krudo lo sigui pa e refineria por bira produktivo bèk. Te ainda no ta konosí si esaki ta posibel òf ku PDVSA ta mira otro impedimentu pa start operashon di e refineria. Entretantu Refineria di Kòrsou (RdK) ta sigui ku su esfuerso pa yega na kontinuashon di e industria di refiná petroli na Kòrsou pa hopi aña mas. Pa esaki tin kombersashon andando ku un kompania skohí, e asina yama “Preferred Bidder”, pa yega na un akuerdo di hür, maneho, operashon i modernisashon ku lo kuminsá despues di fin di 2019.

-Fin