Komunikado Di Prensa

Habitantenan Di Bullenbaai Ta Keda Konekta Riba Ret Di Koriente Di Refineria Isla Mientras Ta Prepara Traspaso Pa Suministro Pa Aqualectra

Willemstad 2 di Novèmber 2019 – Habitantenan ku ta biba den e area di Bullenbaai lo siguí konektá riba e ret di koriente di Refineria Isla te ku dia 31 di desèmber proksimo mientras ta prepara pa Aqualectra tuma over e suministro di koriente. Na Bullenbai tin un populashon chikitu di bibiendanan ku for di tempu di Shell ta konekta riba un ret di suministro di koriente ku ta sali for di e terminal di Bullenbai. E habitantenan aki ta usa i paga koriente meskos ku tur hende na Kòrsou, pero sin ku esaki ta sosodé dor di Aqualectra. Ku terminashon di e operashon di e refineria dor di PDVSA, ta bini un kambio. Aqualectra lo tuma over e suministro di koriente, pero usando e mesun ret. Pa esaki tabata nesesario pa e kompanianan Refineria di Korsou (RdK), Refineria Isla i Aqualectra traha huntu. A disidi ku entrante promé di yanuari e habitantenan lo sigui risibi koriente normal, pero komo klientenan di Aqualectra. RdK i Aqualectra lo traha huntu pa perkura ku e transishon por materialisá.

Proksimamente lo pidi koperashon di e habitantenenan pa por instalá meternan nobo na nan kas i pa laga hasi un inspekshon di e instalashon na e kasnan i kùr esaki, meskos ku Aqualectra ta hasi na tur otro instalashon di kas na Kòrsou.

-FIN-