Komunikado Di Prensa

A base di resultado di investigashon interno

Hunta Di Komisario A Propone Akshonista Pa Retira Sr. Van Kwartel Komo Direktor Rdk Statutario Di Rdk

Gerensia di RdK ta retirá na mes momentu e dos otro empleadonan

Willemstad 25 di yanuari 2019- Hunta di Komisario di Refineria di Kòrsou (RdK), riba 24 di yanüari último a tuma e desishon pa proponé na akshonista di RdK pa retirá Sr. Roderick van Kwartel komo direktor statutario di e kompania. For di e investigashon interno ku Hunta di Komisario a laga hasi a sali na kla ku tin indikashon konkreto ku tabatin iregularidat ku a tuma lugá ante un di e partidonan partisipante den e proseso di lisitashon (bidding) pa yega na un manehadó i operadó pa nos refineria.

Sr. van Kwartel, huntu ku e dos empleadonan di e kompania, a inisiá un trayekto paralelo banda di e trayekto ku a keda stipulá pa yega na un partner stratégiko. Hunta di Komisario ta di opinion ku a base di e resultado di e investigashon no por mantené konfiansa mas den Sr. van Kwartel komo direktor di RdK.

Gerensia di Rdk, na mes momentu ku Hunta di Komisario a hasi su proposishon pa retiro di e direktor na akshonista, a duna retiro inmediato na e dos otro empleadonan ku tabata envolví den e iregularidat.

Ministerio Públiko a hasi entretantu un petishon pa risibí e rapòrt di e investigashon. Esaki lo por tuma lugá dentro di dos siman.

Entretantu e proseso pa yega na un Memorandum of Understanding ku e asina yama “preferred bidder” ta kontinuá. Tin progreso den esaki i ta spera ku pronto lo por firma e akuerdo di entendimentu aki.

#####