Komunikado Di Prensa

Kompanianan A Entrega “Non Binding Proposals” Komo Muestra Di Interes Serio Den Nos Refineria

Willemstad- 16 di yüli 2019- Kompanianan interesá pa operá nos refineria i terminal a entrega un asina yamá “non- binding proposal”. Ayera 15 di yüli tabata e último dia ku por a entregá nan asina yamá “non binding proposal” na Refineria di Kòrsou (RdK.) Esaki ta un paso importante den e proseso ku Project Management Organization (PMO) ta kanando pa yega na un partner stratégiko pa manehá i operá nos refineria i terminal, despues ku e kòntrakt aktual terminá na fin di 2019.

Ta asina ku PMO na fin di Febrüari 2019 a aserká un kantidat di mas di 100 kompania inisialmente pa wak ku nan tin interes pa manehá i operá nos refineria. Un kantidat di 12 kompania a firma un asina yama Non Disclosure Agreement (NDA), kual ta un akuerdo di sekresia, miéntras ku 10 kompania a bin ta bishitá i buska informashon den dataroom virtual, ku informashon tokante di nos refineria. Den luna di mei i yüni dos kompania a bishitá nos refineria ku e propósito pa nan mes mira nos instalashonnan i papia ku personanan relevante. Tur esnan ku a bishitá a keda ku un impreshon positivo di e fasilidat petrolero, e posibilidat pa hasi negoshi i e personal. Ta a base di esaki PMO a emití 10 asina yamá “Proces Letter” i guia di kiko e “non binding proposals” mester konsistí di dje. Sin divulgá kantidat di kompanianan ku a entregá nan proposishon, RdK ta satisfecho kon e proseso ta kanando pa yega na kontinuashon di operashon.

Segun e planifikashon, PMO awor lo evaluá e proposishonnan pa despues yega na firma “letter of intent” ku kompania(nan) den Ougùstùs. Lo hasi un eskoho di e potensial partner stratégiko den luna di Sèptèmber/Oktober òf mas promé. Negosashon ta tuma lugá Sèptèmber, Oktober i Novèmber. Ta spera ku por firma un akuerdo Novèmber òf mas promé.

E trayekto pa yega na un partner stratégiko ta kanando sigun a keda proyektá pa RdK for di febrüari último. PMO ta hasiendo lo máksimo pa kumplí ku e enkargo ku Gobièrnu di Kòrsou a duna RdK; esta pa mantené refineria habrí i perkurá pa un futuro duradero pa nos refineria.

RdK ta konsiente ku komunidat lo kier sa ta kua ta e kompanianan ku a entregá nan proposishon pa sigui ku e proseso. Sinembargo pa kumpli ku e akuerdo “NDA” ku a firma ku kada un di e kompanianan, RdK / PMO lo no por divulgá nòmbernan di kompanianan na e momentunan aki. RdK ta pidi pasenshi i komprenshon di un i tur pa esaki.

-FIN-