Komunikado Di Prensa

Operational Audit Di Cru Mester Duna Bon Bista Di Maneho Di Pasado Pa Por Plania Un Futuro Duradero Di E Planta

Willemstad 22 di aprel 2019- Curaçao Utility Company (CRU) durante di e próksimo 3 lunanan lo pasa den un proseso rigoroso di ouditoria. E asina yamá“Operational Audit”ta un inisiativa di e kompania madre Refineria di Kòrsou (RdK) i lo kuminsá fin di luna di aprel. Durante di e ouditoria lo no wak únikamente e aspektonan di maneho finansiero di e kompania pero lo toka tambe p.e. uso i operashon di e kapasidat instalá, maneho di mantenshon, maneho di riesgo, ingenieria di konfiabilidat i maneho di rekurso humano.

Pues un eskala amplio. Banda di e echo ku e ta brinda un oportunidat di por haña un bista bon kla den e maneho i operashon di pasado di e planta di BOO, e ouditoria ta sirbi tambe pa identifiká oportunidatnan pa mehorá maneho, pa limitá riesgo operashonal i pa haña un bista bon kla kiko mester hasi pa oumentá e konfiabilidat di e planta den futuro. Esaki ta hopi importante den kuadro di e búskeda di un partner stratégiko nobo pa nos refineria, ya komo ku e futuro operadó lo tin e planta di utilidat tambe komo parti di su responsabilidat.

 

CRU den e último lunanan a konosé avanse signifikante. Te ku novèmber di aña pasá e planta tabata pará plat i no tabata den operashon. Hopi trabou a keda hasí i awe e planta pará, pero e ta kla i limpi pa por start-up asina refineria ta bèk den operashon. Esaki no kiermen ku tur problema a keda solushoná. Ainda mester invertí pa oumentá kapasidat di reserva, atendé e shushi ku e kombustibel asfalt ta kousa i implementá sistemanan di atministrashon moderno.

CRU por usa kuater tipo di kombustibel pa e por operá,esta asfalt, fuel, gas i gasoil. Na e momentu aki ta usa únikamente fuel, i no ta usando asfalt pa e parti di e plantanan por drai. Esaki ta perkurá pa ménos sushedat di e ekiponan di manera ku nan ta keda limpi.

E planta di utilidat ta hopi importante pa operashon di e refineria. Den e kombersashon ku ta keda hibá ku potensial partnernan stratégiko ta inkluí e planta di utilidat komo parti di e refineria. Pa por oumentá e konfiabilidat di e planta den futuro lo mester invertí aun mas pa e planta por tin mas redundansha i evitá insidente kaminda e no por entregá manera ta spera di dje. E estudio mester kontribuí na mehorá notablemente, por ehèmpel e maneho di kalidat di e planta, su mantenshon preventivo i rekurso humano. Parlamentu den pasado resien a pidi tambe pa hasi un ouditoria asina. Pues e ouditoria ku CRU lo pasa aden próksimamente ta vital ya ku lo e duna un bista mas kla kon mester ahustá e maneho total di CRU pa e por kumpli aun mas mihó na e futuro di e planta, nos refineria i nos isla.

#####