Komunikado Di Prensa

Rdk Ta Entama Kaso Kontra Di Esnan Ku A Pone Beslag Riba E Barku Icaro

Willemstad 19 di februari 2019- Refineria di Kòrsou (RdK), den estrecho konsulta ku Refineria Isla, a entamá un huisio sumario kontra di esnan ku tin beslag riba e krudo almasená riba e barku Icaro, ku e meta pa logra ku ta almasená e krudo ku tin riba e barko den tankinan na tera i ta laga e barku Icaro sali buska krudo ku ta destiná pa Kòrsou na Venezuela. RdK resientemente a aserka i a sinta ku Refineria Isla pa wak kon por bin ku un solushon pa e echo ku tin beslag riba e krudo ku tin riba e barku Icaro ku ta mara for di desèmber na Bullenbaai.

Meta di e huiso sumario no ta pa kita e beslag for di e krudo debi ku esaki ta algu ku ta regarda PDSVSA i esnan ku a pone beslag riba e krudo. Loke Refineria di Kòrsou, den estrecho koperashon ku Refineria Isla, ke logra ta ku e krudo, riba kua tin beslag, ta keda almasená den tankinan na tera di tal forma ku Icaro por sali buska petroli ku PDVSA tin warda pa bin Kòrsou. Algu ku lo hasi’é posibel pa nos refineria drai atrobe. Loke na su turno ta nesesario pa CRU por ta den funshon i suministra e produktonan nesesario na Refineria Isla.

RdK, di e forma aki, no opstante e echo di no ta partido entre disputa entre PDVSA i terser, ta hasi su maksimo pa pone nos refineria den operashon bèk. Esaki ta parti di e esfuerso mas grandi pa perkura kontinuidat di nos refineria na bienestar di prinsipalmente esnan ku ta traha riba nos refineria pero tambe komunidat engeneral.

#####