Komunikado Di Prensa

Refineria Di Kòrsou A Firma Akuerdo Ku Grupo Klesch

WILLEMSTAD 23 di Desèmber 2019 – Refineria di Kòrsou (RdK) i e Grupo Klesch a firma un Asset Purchase and Sale Agreement (APSA, Akuerdo pa Kompra i Benta di Propiedat) riba Djadumingu 22 di desèmber 2019. Esaki ta un paso firme pa sigurá kontinuidat pa e industria petrolero na Korsou ku ta konsistí di ‘Refineria Isla’, e Planta di Utilidat i e Terminal na Bullenbaai.

E gran logro aki ta pone Kòrsou den e posishon firme pa impulsá su sektor di energia i tambe e otro sektornan asosiá. Esaki lo kontribuí konsiderablemente na desaroyo di e ekonomia di nos isla.

Grupo Klesch

RdK ta konsiderá e Grupo Klesch un partner di negoshi hopi eksperensiá den e sektor di petroleo, kapas pa operá e fasilidatnan di e industria petrolero eksitosamente. E Grupo Klesch ta un grupo internashonal privá ku ta aktivo riba tereno di bienes industrial. Nan tin invershonnan prinsipalmente den e sektor di petroleo, via di Klesch Petroleum Holding Limited. E Grupo Klesch tin un trayektoria ámplio ku atkisishon di negoshinan grandi i nan tin diferente propiedat, den paisnan altamente regulá. Tambe e Grupo Klesch a kompletá transakshonnan ku kompanianan públiko internashonal grandi.

E APSA ta e promé akuerdo ku obligashonnan firmá ku Klesch i ta forma e base pa un relashon pa tempu largu entre partidonan. Lo finalisá i firma algun dokumento ku falta den e próksimo lunanan. E APSA ta enserá benta di e fasilidatnan petrolero den kombinashon ku tereno den erfpacht pa tempu largu.

Proseso transparente

Gobièrnu su mandato pa RdK (ku ta un entidat 100% di gobièrnu) tabata pa sigurá un operadó pa tempu largu pa e ‘fasilidatnan petrolero di RDK . RdK a instalá un Project Management Organization (PMO) ku a kuminsá ku e proseso pa haña un operadó nobo pa e fasilidatnan petrolero di Rdk na febrüari 2019. A kana un proseso rigoroso i transparente ku kriterionan bon definí, ku a informá tur partido partisipante di dje.

PMO asesorá pa IHS Markit, a manda teaser letters pa mas ku 100 partido potensial i a duna presentashonnan gerensial na Partido selektá pa despues manda process letters pa nan. For di adelantá a formulá e proseso pa selektá partidonan pa Non-Binding Proposals. Siguientemente a firma Letters of Intent (LOI’s) ku diferente partidonan selektá. Finalmente, a skohe e Grupo Klesch i a firma un akuerdo di eksklusividat entre RdK i nan riba 4 di sèptèmber 2019. A sigui un due diligence detayá di parti di Grupo Klesch na e fasilidatnan petrolero . PMO i Grupo Klesch a negoshá den un ambiente konstruktivo durante e ultimo lunanan – loke a resultá den e APSA firmá.

Klousura 2020

Awor ku a firma e APSA, partidonan lo sigui traha pa kumpli ku kondishonnan palabrá. E meta ta pa firma dos akuerdo ku falta, pa klousura. Esaki ta planiá pa tuma lugá den e di dos kwartal di 2020.

Mientrastantu RdK lo sigui hasi loke ta nesesario pa realisá un transishon efisiente i rapido di e fasilidatnan petrolero pa e Grupo Klesch.

-FIN-