Komunikado Di Prensa

Refineria Di Korsou A Saka Teaser Pa Kompanianan Interesa Na Partisipa Den Garantisa Operashon Di Nos Refineria Te Ku Fin Di 2019

Willemstad 23 di yüni 2018- Refineria di  Kòrsou e siman aki, konforme loke tin para den e “roadmap” akordá pa realisá e buskeda di un partner stratégiko pa nos refineria despues di 2019, a emití un asina yamá “Teaser” pa inventarisá interes serka kompanianan ku lo por ta interesá na partisipá den garantisá operashon di nos refineria te ku fin 2019. Esaki ta konforme e mandato di Gobièrnu na Refineria di Kòrsou pa tene nos refineria habrí i perkurá pa preservá e kuponan di trabou.  Durante di e último kombersashon ku PDVSA, na prinsipio di yüni, a diskutí e asina yama opshon pa e “third party” aki.  PdVSA tabata habri pa sigui papia riba envolvimentu di un asina yama “third party”.

Bal enfatisá ku den promé instansha ta buska un “third party” ku dado kaso PDVSA no por kumplí ku entrega di sufisiente petroli (tantu kalidat komo kantidat) na nos refineria, e “third party” aki lo por kolaborá.  Ta prudente tene debido kuenta ku kualke eventualidat dado kaso PDVSA no por kumpli mas kompletamente ku su obligashon ante nos refineria.

E asina yamá “Teaser”, manera a keda informá na komunidat anteriormente, a keda manda pa alrededor di 60 kompania.  Ekspertonan di RdK, asisti pa IHS Markit, a traha diligentemente pa yega na e dokumentu E proyekto aki a haña e nòmber  “Project Arawak” i dokumentu a keda mandá pa e potenshal kompanianan. 

RdK  den pasado resien a papia ku kompanianan ku a mustra interes pa, dado kaso un situashon no deseá surgi, drenta komo parti di esfuersonan pa garantisá operashon di nos refineria den un òf otro forma.  Resultado di e akshon aki di RdK (esta emishon di e teaser) mester duna un bista bon kla di kompanianan interesá den partisipá den garantisá operashon di nos refineria i e kondishonnan bou di kua nan ta mira ku esaki ta posibel. 

Den e kuadro aki e apertura, ekspresá pa PDVSA, di ta para habrí pa papia tokante entrega di krudo dor di un terser partido ta brindá perspektiva pa garantia di operashon di nos refineria te ku fin di 2019 (esta durante e kontrato di “lease” aktual) i potenshalmente despues di 2019.

#####