Komunikado Di Prensa

Refineria Di Korsou I Petroleos De Venezuela Ta Dispuesto Pa Traha Huntu Riba Un Proseso Di Transishon Pa Nos Refineria

Willemstad 1 di desèmber 2019. Petroleos de Venezuela (PDVSA) i Refineria di Korsou (RdK) ta dispuesto i lo traha huntu riba un periodo di transishon na momentu ku e aktual kontrakt finalisá na fin di 2019. Esaki ta resultado di e reunion ku a tuma luga djarasbra dia 30 di novèmber último entre Presidente di PDVSA, Sr. Manuel Quevedo i un delegashon di RdK, enkabesa pa Sr. Marcelino De Lannoy, na Caracas, Venezuela. Partidonan a kumbiní ku lo realisá un periodo di transishon ku mester resulta den garantia di empleo pa empleadonan ku aktualmente ta laborá na Refinaria Isla entrante yanuari 2020. Meskos a papia riba e posibilidat pa entamá trabounan di rekuperashon di tal forma ku kontratistanan tambe tin trabou i nos ekonomia en general lo tin mas probecho durante di e periodo di transishon. En prinsipio a akordá un durashon maksimo di un aña pa e periodo di transishon.

Hopi importante den esaki ta ku tur lokual ku partidonan hasi mester ta den e kuadro di posibilidatnan ku e lisensia di eksonerashon ku RdK a risibi resientemente di Office for Foreign Asset Control (OFAC), ta duna. PDVSA i RdK lo traha huntu pa asina krudo por yega nos Refineria Isla i plantanan di nos refineria pronto ta den operashon.

-FIN-