Komunikado Di Prensa

Refineria Di Kòrsou Ta Kla Pa Negoshá Ku Partner Strategiko

Willemstad 4 di Sèptèmber 2019 – Refineria di Kòrsou (RdK) a dal un siguiente paso importante den e proseso pa mantené e fasilidatnan petrolero na Kòrsou den operashon. E fasilidatnan ta konsistí di nos refineria, terminal di Bullenbaai i e kompania ku ta produsí utilidat pa refineria (CRU). RdK a skohe, riba rekomendashon di su Project Management Organization (PMO), Klesch Group pa negoshá eklusivamente kun’é pa yega na un akuerdo nobo pa e fasilidatnan petrolero. E negosashonnan ta programá pa tuma luga durante di e próksimo 3 lunan ku e intenshon pa yega na un akuerdo final no mas tardá ku Novèmber 2019.
PMO a hiba un proseso transparente di skrutinahe basá riba kriterionan bon definí i ku a keda komuniká na tur partido ku a partisipá den e proseso. E kriterionan a keda definí pa asina por selektá e partido ku mihó ta sirbi e interes di un futuro duradero di Kòrsou su fasilidatnan petrolero. E proseso pa yega na un partner strategiko ta drenta un fase importante i kritiko awor ku a selekshoná e partido preferí pa kuminsá un proseso ekslusivo di negosashon.
Klesch Group ta un grupo privá internashonal ku ta hasi negoshi den materia prima industrial i ku invershon prinsipalmente den sektor petrolero bou di nòmber di Klesch Petroleum Holding Limited. Klesch Group tin un trayektorio sólido di atkisishon di kompaníanan ku hopi aktivo den merkadonan estriktamente regulá i a konkretisá transakshonan ku kompaníanan internashonal grandi.
Klesch Group ta operá den kuater pais i tin un entrada di aproksimadamente 3 bion di dòler merikano. Nan propiedat mas importante ta Heide Refinery (anteriormente un refineria di Shell) den e parti nòrt di Alemania. E refineria aki tin un kapasidat di aproksimadamanente 92 mil barí pa dia (4.5 mion tòn pa aña) di krudo i tin un “Nelson Complexity Index” di 9.9. Heide Refinery, ta wòrdu konsiderá e di dos dunadó di trabou mas grandi den e region i ta forma parti integral di e ekonomia lokal. E refineria ta haña sosten for di London (UK) i Geneve (Switserland) pa su aktividatnan komersial, merkadeo, kompra, maneho finansiero i sobra sosten korporativo.
Tantu RdK komo Klesch Group ta konta ku koperashon di tur hende i lo traha deligentemente pa yega na un aliansa benefisioso i duradero.
####