Komunikado Di Prensa

Ya den e dos promé lunanan

Refineria Di Korsou Ta Dal Pasonan Konkreto Pa Realisa Modernisashon Di Nos Refineria I Garantisa Su Operashon

Willemstad 13 di Febrüari 2017 – Refineria di Kòrsou (RdK), den korto tempu, a dal algun paso importante den kuadro di modernisashon di nos refineria i búskeda di un partner sólido, ku kapasidat i konosementu pa realisá e desaroyo importante aki na bienestar di nos refineria. Miéntras RdK ta hasiendo lo máksimo pa perkurá ku e refineria ta keda den operashon, te na momento ku e kontrato aktual ku PDVSA terminá na fin di 2019. 

RdK resientemente a saka e “Request for Proposal” pa por atkerí servisio di un eksperto ku konosementu i eksperensha riba tereno di refinashon pa asistí den e búskeda di kandidatonan potensial pa operá i manehá nos refineria despues di 31 di desèmber 2019.  Ta spera ku mas tardá pa aprel lo por a hasi un eskoho di e kompania ku lo mester asesorá RdK den e búskeda speshalisá aki. E kòmbersashonnan entre e komishon tékniko miksto di ekspertonan di RdK i PDVSA tambe ta kanando fruktífero. RdK entretantu ta tumando e pasonan nesesario pa garantisá ku e refineria ta keda operashonal te na momento ku e kontrato aktual ku PDVSA vense. RdK lo sigui suministrá komunidat ku informashon verídiko na momento ku esaki ta di importansha pa komunidat tuma nota di dje. 

RdK ku akshonnan konkreto pa garantisá operashon di refineria

Den e último lunanan vários partido a presentá nan mes na RdK demonstrando interes pa drenta den un asina yama “processing deal” ku lo mester garantisá operashon di nos refineria den e periodo di 2018 i 2019. RdK lo tuma pasonan konkreto pa perkurá ku nos refineria ta keda den operashon. 

E echo ku Inspektor di Stoomwezen a duna un luna mas pa Boiler 2 di CRU keda den operashon ta yuda krea e kondishon pa permití Refineria Isla start up su planta di Catckraker.  Ku Catcracker den operashon ta garantisá suministro di gasolin na merkado lokal pa e próksimo lunanan. Operashon di Cat Cracker ta esensial pa mitigá pérdida di oportunidat pa e refineria. Ademas ta bon pa resaltá ku ya a sostené varios reunion entre ekspertonan di RdK/CRU i ekspertonan di Isla den kual a diskutí senarionan di demanda di tantu koriente komo “stoom” pa por trata di respondé agilmente na esaki. Un posibel opshon ku ta riba mesa ta kompra of hür di asina yamá “package boilers”. Tambe a manda “muestra” di e material di pipanan di Boiler 3 afó pa un kompania spesialista analisá esaki i guia nos riba e aserkamentu di reparashon mas rápido.

Por papia ku GZE, pero no bou di kondishon eksklusivo

Ta bon pa enfatisá ora ku gobièrnu, na fin di 2017 a nulifiká e akuerdonan ku Guangdong Zhenrong Energy Co. Ltd (GZE), a pone bon kla ku kualke kombersashon despues di esaki no ta kai bou di loke anteriormente a keda akordá pa loke ta eksklusividat.  Manera ta konosí a resultá ku GZE, kontrario na loke a keda pintá na momentu ku a firma e MoU, no por a demonstrá di tabatin e abilidat pa karga un proyekto grandi manera nos refineria.  GZE no tin tampoko e sosten inkondishonal di gobièrnu Chines kontrario na loke tabatin poné den e MoU ku RdK a será ku nan.  Tur e dos puntonan aki tabata puntonan kardinal a base di kua Gobièrnu a firma e MoU ku GZE.  GZE den e MoU a hasi menshon tambe di vários kompania di estado chines notabel ku nan tabata huntu kuné den un konsorsio, pero a resultá ku esaki no tabata e kaso i a presentá otro instansha di ménos renombre komo e partido ku mester perkurá pa e kapital.  Ta bon enfatisá ku RdK ta para habrí pa kombersashon ku GZE meskos ku kualke otro partido ku ta interesá di ta un partner stratégiko serio pa e refineria di Kòrsou.

Tur partido ku presenta su mes mester tene kuenta ku e trayekto ku RdK ta kanando pa haña un partner strategiko, esta den promé instante buskada di un partner strategiko i despues konhuntamente ku e partner strategiko buska un kompania òf konsorsio di kompanianan ku tin interes den e pakete ku Rdk / Kòrsou tin di oferese, esta refineria, bullenbaai i planta di gas LNG òf gas natural.

Bal aklará tambe publikashonnan ku a sali resien.  Den sèptèmber 2016 E&Y, Information Handling Systems (IHS) i bufete di abogado HBN Law a indika ku GZE ta parsialmente  propiedat di estado pero esaki no por keda konsidera un “due diligence” riba nan abilidat tèkniko i kapasidat finansiero.  GZE a indika di lo a traha den un konsorio ku Sinopec, CNPC i CNOOC pero nunka GZE no a presenta un akuerdo/kontrakt entre GZE i e kompaninan aki ku nan lo traha huntu riba e proyekto aki.  Entretantu na yanuari 2017 Sinopec a kibra relashon ku GZE. 

IHS bèrdat a hasi un due diligence  riba Sinopec i a konklui ku Sinopec ta un kompania solido.  Sinembargo Kòrsou no a sera un akuerdo ku Sinopec sino ku GZE.  GZE entretantu no por konta ku partisipashon di Sinopec.

Resultado rapòrt E&D Technologies ta preliminar

RdK a tuma nota tambe di komentarionan den komunidat a base di un rapòrt ku E&D Technologies a traha riba petishon di RdK.  E rapòrt aki ta preliminar enbista ku e ta un vershon sin ku Refineria Isla mes a komentá e loke tin pará den e rapòrt ainda.  Resientemente Refineria Isla manda su komentarionan pa RdK.  Debí na esaki e rapòrt preliminar por ta kontené impreshonnan no kompletamente korekto ku den e rapòrt final, awor ku e komentarionan di Refineria Isla aden, ta keda nuansá i posiblemente hasta kambiá.

FIN