Komunikado Di Prensa

Refineria Di Korsou Ta Kontinua Ku Proseso Di Buska Partner Strategiko Pa Nos Refineria Despues Ku Preferred Bidder Ta Gradisi Pa E Honor

Willemstad 4 di yanüari 2019- Refineria di Kòrsou (RdK) durante di e último dianan tabatin kontakto intenso ku e kompania ku a keda skohé komo ‘preferred bidder’, den e proseso pa yega na un manehadó i operadó pa nos refineria, despues ku e kontrakt aktual finalisá na fin di 2019. RdK a risibí notifikashon di e partido enkuestion, ku despues di un evaluashon i interkambio intensivo e gerensia di e ‘preferred bidder’, no ta deseá di kontinuá mas riba e rumbo pa un negoshashon pa bira e manehadó i operadó di nos refineria.

E kompania a mustra interes sí den algun forma interesante di traha ku nos refineria, unabes tin klaridat riba operashon i maneho di e refineria, despues ku e aktual kòntrakt finalisá. E rason ku e kompania a duna pa no kontinuá den e proseso, ta ku durante di e periodo ku mester a warda pa e investigashon interno na RdK tuma lugá i ku finalmente a keda kla, e kompania a hasi un reevaluashon interno i a ahustá loke pe mester bira proyektonan mayó di prioridat pa futuro. A base di un kombinashon di faktornan, inkluyendo e retraso okashoná dor di e investigashon i oportunidat nobo ku a desaroyá, e kompania a disidí di no sigui ku e proyekto aki. Esaki kontrario na loke tabata nan pensamentu na fin di aña pasá, promé ku mester a hasi e investigashon, ora ku nan tabata kla pa firma un MOU i kuminsá negoshá ku RdK.

Unabes RdK a tuma nota di e desishon di e kompania mesora a dal pasonan pa siguí ku e proseso pa yega na un manehadó i operadó. Lo sigui ku e proseso pa atendé ku e dos otro partidonan ku a keda selektá komo potensial partner stratégiko pa nos refineria, konforme manera e proseso di selekshon a keda deliñá na promé instante. E tim enkargá ku e proseso pa yega na e partner stratégiko ya ta trahando huntu ku ekspertonan internashonal pa asina rápidamente por dal e pasonan nesesario. Den esaki ta tene debido kuenta ku e interes ekspresá pa PDVSA den maneho i operashon di nos refineria.

RdK ta lamentá ku un proseso ku tabata kana asina fruktífero a keda frustrá dor di algu ku a eksigí un investigashon interno i konsekuentemente tin su efekto negativo. Esaki ta suprayá un biaha mas e nesesidat pa kada ken ku ta direktamente envolví ku e proseso, pero tambe kada un di nos engeneral, pa atendé na un forma responsabel i madurá ku e proseso. Mantenshon di nos refineria habrí, i ku un futuro duradero i sostenibel, ta importante pa tur esnan ku ta traha riba nos refineria, pero tambe pa nos bienestar en general.

#####