Komunikado Di Prensa

Un Futuro Pa Nos Refineria I Oportunidat Pa Desaroyo Nobo

E balor di e transakshon ku nos refineria:
UN FUTURO PA NOS REFINERIA I OPORTUNIDAT PA DESAROYO NOBO

WILLEMSTAD 26 di desèmber 2019– Refineria di Kòrsou (RdK) a tuma nota di algun intepretashon eronio tokante di e akuerdo ku RdK a logra ku e Grupo Klesch pa garantisá un futuro duradero pa nos fasilidatnan petrolero. Pa e motibu akí RdK ta haña ku ta nesesario pa aklará algun punto rondó di kua tin hende ta trata na krea konfushon.

E balor pa kua a bende e refineria ta sinta den por lo menos kuater aspekto: e miones di florin ku Kòrsou ta evitá di mester invertí pa pone e refineria bèk den kondishon óptimo; e pago ku nos lo risibi tur aña pa uso di e tereno (ku ta keda nos propiedat) na èrfpacht, esta 15 mion dòler pa aña (anualmente ta subi esaki ku un tasa di inflashon te na un máksimo di 2%); e loke porfin nos lo bai risibí riba kada barí di krudo òf produkto derivá ku keda deskarga via di Bullenbaai (koregí tur aña ku un tasa di inflashon te na un maksimo di 2%)i e echo ku banda di esaki a logra disponé di alrededor di 180 hèktar di tereno riba kua Kòrsou por bai desaroyá mas industria awor pa medio di RdK, loke ta nifiká mas aktividat ekonómiko i mas kupo di trabou.

Pa un invershonista por bai banko i pidi un fiansa pa e hasi invershon, e mester tin e fasilidatnan en kuestion den su bukinan. E montante simbóliko di 1 dòler den e transakshon hasí, ta pa e Grupo Klesch tin e propiedatnan konserní den su bukinan – pero esaki ta nada, kompará ku e miones di florin ku Kòrsou ta bai probecha di dje di awor en adelante na invershonnan den nos refineria i na pago tur aña di 15 mion dòler na erfpacht i US$ 0.15 riba kada barí di krudo ku wordu deskarga den nos terminal na Bullenbaai. Ku e dil akí Kòrsou a logra garantisá un futuro mas sigur pa nos refineria, algu ku nos lo no por a logra si nos lo a bolbe hür e refineria.

Ta bon pa sa ku IHS Markit (pues e mesun IHS Markit ku a hasi e evaluashon na 2015) a hasi un balorashon di e fasilidatnan na sèptèmber 2019. Un punto importante den e rapòrt di e balorashon akí ta, ku tin un atraso supstansial den mantenshon di e fasilidatnan. Den e negosiashonnan a tene debido kuenta ku e balor di ámbos fasilidat petrolero pero tambe ku e atraso supstansial den mantenshon.

Kòrsou di bèrdat a logra algu grandi, si wak rònt kiko ta pasando ku refinerianan na mundu, inkluso nos region. Rònt mundu refinerianan ta serando nan porta. Na Brazil Petrobras a sera no menos ku 8 refineria. Un refineria na Ecuador a sera. E refineria na Aruba ta será ya pa sierto tempu. Resientemente Trinidad a bende su refineria ku e sindikato ku ta representá e trahadonan den e refineria. E refineria na St. Croix, ku tabata será desde 2012, a kuminsá operá (parsialmente) atrobe resientemente numa. Yegando na un akuerdo ku un operadó, Kòrsou a logra di evitá ku nos refineria ta sera i ku Kòrsou lo a hañ’é den mesun situashonnan mas difísil manera menshoná. Pues nos a logra garantisá kontinuidat di operashon. Ponementu di e refineria bèk den operashon ta nifiká trabou atrobe pa, por ehèmpel, nos kontratistanan. Unabes e refineria ta bèk den operashon, esaki ta nifiká ku kompanianan manera KTK ta bolbe haña trabou danki na e tráfiko di barku di krudo pa prosesá den nos refineria.

E Project Management Organization (PMO) di RdK a kana un trayekto transparente i efektivo den un tempu rekòrt. For di 2013 Kòrsou a inisiá un trayekto pa yega na un manehadó i operadó pa ora ku e kontrakt ku PDVSA vense dia 31 di desèmber awor. Ningun di e intentonan pa yega na un partner no a logra promé ku e trayekto inisiá pa e PMO na febrüari di e aña akí. Den un trayekto bon transparente pa tur kompania ku a partisipá na dje, a kana i yega na un kulminashon satisfaktorio ku e akuerdo resien ku e Grupo Klesch.

Awor e enfoke di RdK ta pa garantisá un transishon suave te na e momentu ku e Grupo Klesch tuma rienda di e refineria. Komo parti di e esfuerso akí ta negoshando ku PDVSA. E meta ta keda: un transihon harmonioso.

FIN DI KOMUNIKADO